《愛·回家》宣傳活動丨疑似不雅片流出吳偉豪繼續深潛 劉丹開通撐：朱凌凌根本冇做錯

劉丹、呂慧儀、周嘉洛及蘇韻姿剛才於將軍澳電視城出席處境劇《愛·回家之開心速遞》宣傳活動，齊齊落手炮製特色涼拌菜式提前賀母親節，而疑似有不雅影片流出嘅吳偉豪則未有現身。

{{hket:inline-image name="ae7e6d92-5297-47cd-810c-593a706256a2.jpg"}}{{/hket:inline-image}}

吳偉豪嘅不雅片流出，有傳佢會因此事被雪藏，甚至會被踢出《愛·回家之開心速遞》。劉丹就幫口反問在場記者有邊個冇拍過呢啲片，「我成日都講一句，朱凌凌（吳偉豪）根本冇做錯，只不過係交友不慎。同埋講真呀，我哋都後生過。成日都想問吓年輕人自己有冇做過呀？都冇人夠膽話冇。（現場鴉雀無聲）咁咪係囉！大家都知咩事，只不過佢唔好彩。大家講啲鼓勵說話，將事情慢慢丟淡佢，等佢重新投入工作。」

{{hket:inline-image name="ae223f3f-9263-4dd9-bf28-4e4cd89e0d39.jpg"}}{{/hket:inline-image}}

而好友周嘉洛、蘇韻姿都有傳訊息關心吳偉豪，周嘉洛說：「希望大家畀佢一啲時間同空間。（他現時心情、情緒如何？）近期冇去了解，因為我都準備開劇。」同時表示冇聽過劇組停拍有吳偉豪嘅戲份。對於呢次不雅影片事件，佢覺得社會有好多唔同標準，大家可以先睇清楚件事，咁早妄下判斷對吳偉豪唔公平，「希望大家學識互相尊重，畀啲空間佢。」

周嘉洛現正為新古裝喜劇《痞子殿下》開工，《愛·回家之開心速遞》嘅戲份亦已完成，佢話只要有時間都會返嚟支持，希望今次只係暫別。蘇韻姿則指周嘉洛離開後，拍攝現場靜咗，自己仲適應緊。講到二人於《大整蠱》中被劉丹爆戀情？周嘉洛連聲否認，指丹爺只係講笑，叫大家唔好咁認真，「我都襯蘇韻姿唔起！」蘇韻姿即時耍手擰頭，「唔敢當，你而家係古代人，我哋之間有幾百年代溝！」

（點擊圖片放大）

提到母親節，呂慧儀表示今年母親節要工作，所以上星期已經同阿仔去主題公園提早慶祝。呂慧儀指阿仔不斷用佢嘅錢去扔公仔，再送番畀佢做母親節禮物，「雖然係我嘅錢，而且好貴，但見到佢好努力去扔，都好冧！」劉丹笑言：「媽咪大把錢，唔怕啦！佢之後有女朋友就唔會理你！」劉丹透露母親節簡簡單單喺屋企同太太、子女食飯慶祝，「小糯米通常會送畫畀嫲嫲，先唔講畫得好唔好，起碼有心；不論佢畫得好唔好，我哋都覺得靚。」